العيد فرحة

بسم الله الرحمن الرحيم











كل سنة وانتو طيبين وعيد سعيد عليكم وعلينا وعلى الأمة الإسلامية كلها
اخبار فرحة العيد معاكم ايه .. وهل بقيتوا تشعروا بيها زى زمان ؟؟
يعنى بمعنى تانى لسه بتحسوا ان العيد فرحة وبتستنوه على نار ؟؟
منكرش ان التغير من الطفولة إلى الشباب او الرجولة أثر بشكل كبير على درجة الفرحة بالعيد وشكلها
بس أقولكم سر ..
انا لسه بحس بالعيد فرحة :))
ولسه بستناه على فكره :)
السهر مع أصحابى ليلة العيد لحد بعد الفجر وصلاة العيد سوا ... الفطار مع العيلة - واللى دايما بيبقا عامر بألذ الوجبات - الوقوف طابور لأخذ العيدية من والدى ولو بشكل صورى مع كم الضحكات والنكات اللى تلقى فى تلك اللحظة .... وبعد كده المرور على اقاربى - من الدرجة الأولى طبعا - ع السريع كده ... الواحد يجى ينام :))
العيد السنة دى ضفتله فرحة جديدة ...
أه طبعا معظمكم عارفين انى خطبته ... ألف مبروك ليا p:
الفسحة بقى مع خطيبتى تانى يوم العيد ... حاجة جمييييييييييييييييييييييييييلة جدا
أى نعم أخوها الصغنطوط كان قارفنا :))
بس مش مشكلة كلها شهرين وأخلعه من حياتنا للأبد ... هههههههههههه
الخلاصة العيد السنة دى كان غير ..:)

كلنا عارفين ان الأطفال بيحسوا بالعيد أكتر من الكبار وبيتفننوا فى الإستمتاع بالعيد
وانا كنت بحب العيد وانا صغير أكتر من وانا كبير - لو اعتبرت انى كبرت دلوقتى - p:
وبستمتع جدا وانا بتفرج على الأطفار وهيا بتلعب وبتشترى ألعاب وشبسى وحجات كتير ولابسة الهدوم الجديدة وحجات كتير من دى :)
أحكيلكم موقف أول يوم العيد حصلى
انا عملت طقوس العيد المعتادة من سهر مع الأصدقاء وصلاة العيد وجولة بعد العيد فى البلد والإفطار مع عيلتى وأخد العيدية ... المهم لبست ونزلت عشان أعدى على ابن عمى لنبدأ جولتنا لزيارة الأقارب
جيراننا عندهم أطفال تتراوح أعمارهم من من سنتين لحد تقريبا 8 سنين
دايما بشوفهم بيلعبوا ويتنططوا تحت البيت
المهم وانا معدى قدام بيتهم لقيتهم بيلعبوا .. عيد بقى :)
الوضع عادى ومألوف فى العيد
لقيت واحد منهم اسمع عمر - تقريبا 3 سنين - بيندهلى .. "عمو محمد انت رايح فين "
انا رديت " رايح أعيد على قاريبى يا عمر .."
"الله مش العيد خلص ........"
انا صدمت من المقولة دى .... العيد خلص ازاى ... دا احنا لسه الساعة 9 أول أيام العيد
يالهوى .....
ساعتها انا صدمت للمرة التانية ... عمر وأخواته خلعوا ملابس العيد الجديدة ولبسو ملابس عادية - ترنجات -
..............
........
يعنى بجد العيد عندهم خلص وبقى يوم عادى بيمارسوا فيه لعبهم العادى
معدش يوم العيد اللى كنت بستناه وانا صغير عشان ألعب واجرى طول النهار وافرح بالعيد ....
انا مشيت مذهول بجد ومرديتش عليه
كل اللى كنت بفكر فيه إزاى الفرحة اتسرقت من الأطفال دى بالطريقة دى
مع العلم ان مستواهم المادى كويس جدا يعنى مش مسألة فقر
بل بالعكس بمر فى حارات ومناطق فقيرة جدا وبجد معالم العيد ظاهرة عن المناطق التانية
كملت العيد بطقوسى المعتادة وسيببت نفسى لفرحة العيد .. بس عمر فضل شاغل دماغى ....

تحياتى شمس ^_^