اه يا زبالة

الموضوع دا بقاله حوالى اسبوع أو أكتر شوية لكنى تذكرته الآن ... ليه؟ ... لأنى شوفت كلب قاعد يبعتر فى زبالة على شط الترعة
وزى منتو عارفين انا من قرية يعنى مش من جاردن ستى زيكم فعندنا ترعة :) .. بس دا مش قصتنا النهارده
انا كنت رايح أجيب حجات لشغلى من المنصورة .. وفى الطريق شفت مشهد بايخ وكان نفسى يبقى معايا ساعتها موبايل بكاميرا عشان أصوره عشان محدش يقولى بتفترى على الناس وبتاع ... المهم الموبايل مش قصتنا النهارده برده :)
المشهد دا كان عبارة عن عربة تابعة للجيش - ولاحظوا ان الموضوع دا بعد الثورة بكام شهر أهوه - المهم العربية دى كانت بترمى بقايا ومخلفات الأكل (زبالة يعنى) بتاعت الجيش فيييييين ... على جنب الطريق المرصوف -بينه وبين الأراضى - o_O
طبعا انا اتصدمت ازاى يبقى الجيش وعمال يلوث الدنيا كده وقارفينا بمشاريع البلدية بتاعت جمع القمامة والإشتراك فيها اجبارى ... ما علينا
المهم المشهد التانى اللى زعلنى ... رجلين وامرأة يقفون تحت العربية ويتلقفون ما يقذف الجنود من بقايا فيفتشون فيها عما يصلح للأكل :(
اولا فيه حاجتين انا اتضايقت منها فى الموقف ده
اولا ازاى يبقى الجيش هوه اللى بيوسخ فى البلد
ثانيا مدام فيه بقايا كتيرة أوى كده فى الجيش ميوزعوا جزء من التعيين بتاع الجيش بدل ميرموه على الغلبانين والناس اللى مش لاقيه تاكل بدل ميفتشوا فى الزبالة

لماذا ندون؟؟

بسم الله الرحمن الرحيم

لماذا ندون ؟؟!! .. سؤال يطرح نفسه ...
أنا لا أدرى لماذا ندون .. مش لأنى كنت فى الحمام ساعتها زى الزعيم مكان بيقول .. لكن لأن دا له أسباب كتيرة جدا
فيه ناس بتدون لأن عندها خبرات عاوزة توصلها لناس تانية
وناس بتنشر أخبار أمم ودول تقوم وتزول
وناس بتكتب خواطر فقصص فروايات فكتب فمعرفة ينهل منها الجميع
وناس بتدون عشان تظل كلماتها فى ذاكرة البعض لفترة من الزمن
انا بقى بدون لأنى مش لاقى حاجة تانية أعملها
غريب المنطق ؟؟
لأ مش غريب ولا حاجة
انا بدل مدوش دماغ واحد صاحبى بحكايات تافهة او مريضة
هجى أدوش دماغكم هنا
وانتم ذنبكم ايه ؟؟
ذنبكم انكم دخلتوا هنا ولو بالغلط :)
فهتسمعونى هتسمعونى
ممكن تستفادوا حاجة وأشك فى كده طبعا
وممكن تضحكوا على حاجة وبرده أشك فى كده
بس الأكيد انكم هتضيعوا هنا وقت معايا
تسمعونى ولا دا مش حقى عليكم ؟؟؟

أخوكم شمس ^_^